أثارت قصة حب اصفهان وصافيناز نورالحسن جدلا واسعا داخل المجتمع الطهراني ، ومن أجل إلقاء المزيد من الضوء على هذه القصة قمنا باستضافتهم لمعرفة كل التفاصيل عن تلك القصة التي يعجب بها جميع الشعب المنتاريكي

س : سيد اصفهان كيف عرفت انك احببت صافيناز ؟
ج : معرفش كل اللي حصل اني كنت ايام كتيره اجاهد مع نفسي عشان استريح ....مرة واحد بس وانا راجع من الشارع قالت لي جارتي اللتي كثيرا ماتقف على السلم لتتشاجر معي قالت لي "يالهوي وشك نور يا اصفهان انت راجع من عند الملايكة " خفت اجاوبها اني لسه مئابل صافيناز على أحد مقاهي التركمنستان الشرقية

س: يعني انت عايز تئول ان الحب بينور الوش طب ما الكريم برضة بيعمل كدا ؟

ج : والله انا معرفش بئى كريم ولا مش كريم انا اللي اعرفه اني مشدود لصافيناز ومش لائي فيها اي عيب كمان انا مبحطش كريم على وشي انا بغسل وشي بمايا وصابون وبذكرياتي مع صافيناز وكدا الدنيا طب حولة وخلاص

س : طب وأخرة القصة دي ايه ؟
ج : معرفش بس اكيد التناثر

س: يعني ايه التناثر
ج: يعني كل واحد فينا يبئى التاني لدرجة اننا منعرفش بعض ونتجزأ لملايين ملايين القطع الضوئية زي مبنشوف في افلام الخيال العلمي

س : ايوة بس دي افلام ؟
ج: يمكن بس اللي انا حاسس بي اليومين دول احلى من الافلام

س : طب ما يمكن هي مبتبحكش ؟
ج: كفاية اني انا احبها حتى لو هي متعرفش كفاية الشعور الجميل دا

س: مش شايف ان سيادتك خيالي
ج : أكيد وإلا ماكنش اهلي يسموني اصفهان واهلها يسموها صافيناز

س : يمكن عشان انت برج قوس كلب
ج: ممكن

س : صحيح هي صافيناز برج ايه
ج: والله لو حدق وذكي اولي انت